我哋早排去咗位於佐敦嘅素食音樂cafe食晚餐，當晚仲有位叔叔彈結他唱歌，有live music嘅日子可以參閱店方嘅社交平台。食物屬蛋奶、五辛素，但可走蛋奶、芝士、蔥蒜。

水牛數波波 ($78)
係沙律菜嘅表面鋪上番茄片同水牛芝士片。沙律菜有微微醋嘅酸味。水牛芝士味道比較淡，不過食得多會有少少膩。


素蟹寶寶 ($120)
轉純素漢堡包
純素麵包嘅邊好脆口，中間質感軟熟。素蟹餅咬落有素肉一絲絲嘅口感，鹹味適中。番茄醬似係自家製，質感似番茄蓉，唔同於一般現成買嘅茄汁。


大眾踏單車郊野上 (鮮牛油果温泉蛋忌廉意粉) ($78)
意粉用上闊條麵，醬汁有淡淡牛油果嘅味道，整體味道偏清淡。蛋黃呈凝固狀態，其他配料有冬菇、翠玉瓜同毛豆。


金沙特飲 ($65)


新命之王 特飲 ($58)

我哋大年初一去咗ovo cafe食午餐。 忌廉芝士牛肝菌扁意粉 ($128) 午間套餐 咖哩喇沙湯麵 ($138) 配是日餐湯、和風餃子、凍紅石榴汁 和風餃子嘅皮好香脆，表面掃上甜甜哋嘅日式醬汁。餃子嘅餡料以素肉為主。是日餐湯係南瓜湯，味道香甜。 喇沙幾好味，辣得黎，帶有香濃嘅椰汁味。配料豐富，有豆卜、百葉豆腐、素魷魚、冬菇、芽菜、素丸、紅蘿蔔、枝竹、椰菜花等。 純素全日早餐 ($138) 配熱玄米茶 全日早餐嘅材料有素芝士粟米大啡菇、鹽酥素雞髀、芒果沙律、雜果、純素麵包、紅豆抹茶麻糬小丸子。

餐廳會聘請長者做侍應，落單用QR code，可以選擇唔同嘅飲食偏好，例如走蔥、少蔥、走筍、走芽菜等。 油揚蟲草花秋葵拉麵 ($68) (走蔥) 配料有筍乾、木耳、粟米、銀芽、溏心蛋、椰菜、甘筍等，湯底味道啱啱好，有味之餘唔會太鹹。拉麵爽口彈牙。

All for one cafe早排推出咗素食火鍋，推廣價$65，但我哋上星期去到嘅時候原來推廣期已完，依家係$85，包一人素火鍋、蔬菜配料、麵食 (可揀烏冬或即食麵)、飲品 (檸檬茶或檸檬水；凍飲+$3)、調味料 (豉油、辣椒粒)。火鍋湯底可揀芫荽皮蛋湯、番茄湯、沙嗲湯或豆乳湯。 素食火鍋 ($85/ 位) 豐盛蔬菜籃 唐生菜、娃娃菜、金菇、本菇、車厘茄 冬菇、豆卜串、生根、響鈴、芋絲、豆苗、白蘿蔔、烏冬或即食麵 湯底係用菇粉調味，所以顏色偏啡。湯底食食下都幾鹹。

二訪深水埗嘅悅素。我哋星期六嘅下午到訪，當日人手不足，所以落單同上菜都好慢，而且有漏單嘅情況出現。 下午茶 Afternoon tea 歐式酸種多士系列 D. 紫菜牛油果 ($48) 酸種麵包係自家製，無蛋奶成分。口感香脆，底部完全無燶，有淡淡檸檬嘅清香味。 菠蘿素牛油包 ($38) 菠蘿包嘅皮酥脆，同普通菠蘿包冇分別，但包中間嘅位置比較濕。 下午茶餐 奉送$32飲品一杯 蘋果汁 雜果汁 全日菜單 A01 摩洛哥番茄湯 ($30) 番茄味濃，帶有少少黑椒味，似羅宋湯。配料有甘筍、西芹、黃豆、香草等。 M06 煙燻素丸番茄意大利粉 ($98) 整體味道比較鹹，肉丸實得黎，帶有少少彈牙嘅感覺。意粉爽口。

Cruising coffee位於元朗世宙商場，惠康斜對面。店內環境較細，但食物質素唔錯，食材夠新鮮。因為呢到主打咖啡、飲品，所以每人最少要點一杯飲品。 Veggie All Day Breakfast 素全日早餐 (unit $118；set $138) Avocado egg mash, chickpeas, scrambled egg, portobello, half bagel with cream cheese or sourdough with butter, baked beans, cherry tomato, mixed green with balsamic glaze 麵包可選酸種包或貝果，我揀咗酸種包。麵包香脆，味道唔太酸。大啡菇好多汁，冇咩菇菌嘅草青味。炒蛋夠滑，表面保留到生生哋嘅蛋汁。 洛神花山楂 Roselle hawthorn (hot $58；iced $63) 味道酸酸甜甜，好夠熱。除咗洛神花同山楂，仲加入其他藥材沖泡而成。

Menu上有標示素食嘅菜式。餐廳有提供自家製素參巴醬，純素不含五辛。 以下兩款菜式都包含煎蛋，可選太陽蛋或熟蛋。 炸雞髀菇椰漿飯 ($88) 椰漿飯表面似普通白飯，但原來已用椰漿調味，食落有淡淡嘅椰汁味，飯同一般白飯一樣乾身。素參巴醬食落偏辣，撈飯黎食味道剛好。 MiGoreng印尼炒麵 配素菜串燒 ($88) 素菜串燒包含翠玉瓜、秋葵同茄子。串燒表面會淋上沙嗲醬 (含蔥蒜)。 話梅薄荷桔仔梳打 ($40) 芒果熱情果梳打 ($40)

二訪澳門我行我素。今次試咗冬季限定嘅台式藥膳薑母鴨湯麵同午市套餐。 中午特價套餐 包含主食+飲品+沙律各一 M10 濃香南瓜素奶油燉飯 (MOP $78) 南瓜汁包裹住每一粒飯，南瓜味好濃郁，好似飲緊忌廉南瓜湯咁。表面嘅南瓜片口感軟身，但夾起黎唔會爛。 吉列大蘑菇漢堡 配炸薯皇 (MOP $78) 特製大蘑菇扒、秘製醬汁、芝士、生菜、蕃茄 吉列大蘑菇外表好脆口、乾身，秘製醬汁似沙律醬咁酸酸哋，幾好味。 台式藥膳薑母鴨湯 配黑麻油拌台灣麵線 (MOP $85) 藥膳湯底用茶壺另上，有少少似當歸嘅藥材味，但唔濃烈，反而薑嘅辛辣味較強。

好素係粉嶺開咗好素聯和純素餐廳。我哋搭巴士去到聯和墟巴士總站，步行約5分鐘就到。 素黯然銷魂飯 ($78) 素蜜汁叉燒純素煎蛋飯 素叉燒香脆，有蜜糖嘅甜味。第2次食純素煎蛋，口感比真嘅煎蛋爽口。 白龍素豆包雜錦湯拉麵 ($75) 拉麵嘅湯底有淡淡嘅豆乳同味噌味。配料有百葉豆腐、麵筋、腐竹、昆布、粟米粒、木耳絲同紫菜絲。 酥脆素魚皮 ($26；午市優惠: $13) 素魚皮其實係炸紫菜，好脆口，餐廳有得買現成一包包嘅素魚皮。 芫茜山竹素玉球 ($28/ 2件；午市優惠: $14) 最愛嘅菜式之一，素玉球加入冬菇、芫茜、馬蹄同陳皮等材料製成，帶有少少彈牙嘅口感。 麻醬沙薑素雞絲粉皮 ($28；午市優惠: $14)

寶彩軒係夜晚會提供素食私房菜，7點開始上菜。 餐廳經理好着重同客人之間嘅互動。我哋一入去，佢先問我哋係咪第一次黎，如果係就要上堂 (其實就係聽佢介紹餐廳同用餐程序)。每一道菜上嘅時候，佢都會講解菜式嘅用料同特別之處。經理亦好識得搞氣氛，當晚另一枱有人生日，佢唱中、英文版嘅生日歌，仲投入到一邊唱歌一邊跳舞。 當晚經理送咗紅石榴汁比我哋每位客人，紅石榴汁酸酸哋，似飲蘋果醋，可以消下滯。 店員幾細心，係食荷葉包前會先比濕紙巾我哋抹手，食完會收走抹過嘅濕紙巾。食到尾聲，店員會主動派發外賣盒比我哋拎走食剩嘅食物。 11月私房菜菜單 ($398/ 位) 寶彩歡喜拼盤 御品養心松茸燉湯 三絲腐皮卷 招牌即燒厚切叉燒 (配荷葉包) 上湯有機BB菠菜苗 沙律芒果卷 鮮茄香煎菇扒 健康薏仁麵 冰糖桃膠 寶彩歡喜拼盤款式嘅數量係按人數而定，我哋一行5人就比咗8款菜式我哋，包括炸鱔、麻醬秋葵、炸紅菜頭、咕嚕猴頭菇、話梅車厘茄、百葉豆腐、香橙雲耳同欖菜四季豆。 松茸燉湯矜貴之處在於野生松茸片，其餘材料有猴頭菇、冬菇、栗子同腰果。湯好夠熱，有濃郁菇菌嘅香味，湯底夠清。 三絲腐皮卷嘅餡料主要為爽脆嘅食材，包括甘筍、木耳同酸蘿蔔。 BB菠菜苗嘅表面放上炸牛蒡絲，菠菜苗嘅味道比較淡，配上枱面嘅豆豉辣椒油一齊食，會更好食。 沙律芒果卷係我最愛嘅菜式之一，脆漿包住蘆筍、芒果、甘筍同雞髀菇，連埋旁邊嘅蘋果片一齊食。就算係炸物都唔會好膩。 番茄同雞髀菇中間放有蝴蝶粉，賣相幾靚，整體味道酸甜。 健康薏仁麵其實就係炒公仔麵，配料有木耳、甘筍、銀芽、芝麻等。經理話呢道菜要撈起先好食。