影片
電話號碼
29665000
營業時間
今日營業
全日休息
星期一至日
全日休息
以上資料只供參考, 請與餐廳確認詳情
28 瀏覽
為探望居於深山嘅外星人Uncle，XO仔就充當柴可夫，帶領長輩六人潛入新界一日遊，晚餐應眾人要求一試沙田馬會間「Bistro Canter」。會員於會所餐廳用膳可免費泊車，不過遇上暑假裝修期間，六點過後原來都唔易搵位。七人用餐早已訂座，但意外地，車場滿滿時餐室卻吉空無客，細佬可任影唔嬲。店子啡啡綠綠嘅裝潢極富英倫風。用餐大堂格調輕鬆且開揚清爽，雲石餐桌配上半梳化式嘅厚墊椅櫈及木地板，企理衛生。每位席上都擺有齊備嘅自用餐具。一頁餐牌只有英文版。是日精選項目由服務生親自解說，包括是日忌廉蘑菇湯及新鮮生蠔款式，另重點推介為接待處黑板上寫出嘅鱸魚主菜。點好菜，哥哥仔先呈上麵包籃。哥哥真係心水清，見到包品內含果仁，即提點細佬唔可以食，揸車責任重大！其實大肥爸爸訂位時早已提及用餐者有人對果仁敏感，幸好哥哥發現得早，服務生亦即時交帶廚房要加以留神。之後上嘅無果仁甜麵包皮脆包鬆軟，可口味佳。Foie Gras & Chicken Liver Parfait（$128）：以鵝肝及雞肝造出嘅孖肝醬鮮濃柔潤，淨食會較溜，建議最少四人分黎食。連同伴配嘅紅蔥果醬塗上甜麵包多士上可有效地減輕膩滯感，頭盤香脆甜美。Steak Tartare（$168）：用大大條牛骨承載嘅牛肉他他賣相吸精，撈入鮮黃亮麗嘅鵪鶉蛋雖成功為他他質感倍添滑溜，可惜他他本身切得唔夠幼嫩，食落帶韌，調味又過咸，請恕小弟未能推介。French Onion Soup（$108）：呈深啡色嘅法式洋蔥湯內含勁量級嘅洋蔥，無奈過多反令湯品杰得黎仲超咸，中間大大件芝士及浸腍咗嘅麵包都難以索解過份濃郁嘅咸味，邊食邊飲水都起唔到中和作用！Mediterranean Paella（$508 for two）：二人份量嘅地中海鐵鍋飯內含蝦蝦、八爪魚、鱸魚肉、蜆隻及青口，相當足料，當中以肥潤嘅八爪魚肉最為爽脆，啲蜆同魚肉就有啲腥，青口仲粉粉霉霉，直令墊底已經好咸嘅飯飯都腥埋一份，唧上多啲檸檬汁都唔係好辟到陣腥味。Confit Duck Leg（$268）：或許已經預咗油封鴨腿會重口味，反而覺得其咸香可以接受得到，個人只係嫌鴨皮油腍不脆，乾乾嚡嚡嘅鴨肉毫不軟潤，唔係咁掂！Crème Brûlée（$88）：由於多款頭盤及主菜實在太重口味，揸長途車前點都想甜返吓個口，所以就叫咗個大路啲嘅焦糖燉蛋。甜品頂面層焦糖脆卜卜，燉蛋綿滑得黎又唔會太甜，令口腔腸胃都舒服返唔少。馬會西餐廳「Bistro Canter」環境優雅大方，服務生溫文有禮，亦樂於助人，唯獨廚房灑鹽過份重手，絕大部份菜式勁咸，飯後真心覺得自己好似血壓飆升，席上嘅幾位會員都話唔會返轉頭囉！
繼續閱讀
今日跟家人來到這裡，簡單的3人西式晚餐。這裡重新裝修之後也曾經來過，我記得當時牛扒主菜是200多元，現在已經要400多元，加價誇張一來到侍應就推介生蠔，但這天腸胃不太好，就叫了焗蠔焗蠔味道有兩款:芝士焗及煙肉焗味道適中，煙肉香脆，芝士可口，蠔身也鮮味我總是覺得餐廳是用賣不出去的生蠔來做lol主菜叫了一個羊，一個牛，一個豬牛忘記拍照了總括來說她的生熟程度掌握得很好，我們要的medium rare也非常完美份量也很足夠，尤其滿意羊架，有三件大件的水準跟以往差不多，很好，對得住價錢
繼續閱讀
首先，我最推薦係Steak Tartare，生牛肉塔，佢係將生牛肉碎混合其他配菜再加蛋黃，再配脆片黎食。生牛肉既軟身，再配搭脆片，一軟一硬，口感好好，而佢生牛肉入面既配菜亦都令人好開胃。另外我地仲叫左個法式蝸牛 Escargots做前菜，入面就有淡淡既蒜香味，都唔錯。我既主菜係Bouillabaisse，呢個都唔錯既，一開始都覺得佢份量比較少，不過食左三款前菜，所以都差唔多，而且海鮮比較飽肚，而呢個魚湯都幾鮮甜既。最後我地仲叫左甜品，一個係檸檬撻，一個係Profiteroles，咁我就比較鍾意檸檬撻，因為帶酸味，食飽再食甜品咁就無咁heavy，咁另一個就泡芙配雪糕，都係唔錯的。順帶一提，呢間餐廳只招待會所會員，而且餐廳內唔可以講電話，如果講電話有機會收warning letter嫁
繼續閱讀