餃掂手工餃子雲吞專門店

【中西區】【餃掂手工餃子專門店】早幾日同真正哥試咗中環威靈頓街嘅「餃掂」手工餃子，覺得勁好食，於是即刻將呢個信息通知「餃子控」春哥。而呢件事當然係惹來一輪指責，話我做乜唔帶佢去，咁好啦，我帶埋佢去啦。不過我唔多想翻炒食返同一間，於是就同佢去咗試上環嘅另一間店。不過其實係同一間嘢嚟，連餐牌都一樣，坐低就叫嘢食喇。我高度推薦佢哋嘅松茸餃，所以就試 $86 嘅煎「至尊松茸豬肉餃」八隻，呢款煎餃都有配「狀元九鼎湯」，春哥飲咗都覺得好足料。而餃子方面，松茸味勁香，同新鮮豬肉餡嘅味道非常夾，都好好食。我哋試埋 $58 嘅「香煎軟心芝士餃」七隻，裡面有豬肉、粟米做餡，配合香滑嘅芝士，成件事好邪惡。春哥講明特別要我同讀者提及佢哋煎餃嘅火候相當好，値得推薦。我哋仲試咗兩款小食，春哥勁想試嘅係 $26 嘅「麻辣松花皮蛋」，冇令佢失望，相當濃香。而我哋亦都試咗 $32 嘅「日本龍鳳蛋」，蛋味濃之餘，搭配嘅黑白松露醬亦都好香，正。嘢飲方面，春哥試我推薦嘅「自家製山楂雪梨水」，$20 一杯，佢都覺得好飲。我就試 $20 嘅「蜂蜜檸檬薏米水」，清清哋都好潤。夾埋食咗 $242，係值得一試嘅。。。（地址：上環蘇杭街