番本日式放題 (Closed) View

今日無所事事，諗著同朋友搵個地方食吓個放題吹吓水，上openrice睇吓旺角有邊間好。咁啱就睇到呢間番本，見個名幾特別，地方幾就腳，網上評價又唔錯，於是就膽粗粗上去試吓。去到見到地方幾闊落，座位幾多，去到即有位入閘唔使等。要試就梗係要試真啲，二話不說加錢試埋個「升級之體驗」，我哋第一輪就點咗個赤蝦、帶子、油廿魚、燒羊架同埋個忌廉煮青口。刺身固然係厚切加鮮味，賣相砌得靚靚仔仔。但最意外係個羊架同青口，係意外咁好食，真係忍唔住想點多幾轉，奈何要留肚試其他嘢，唯有下次嚟再食過。生嘢食唔到太多，食完一轉後我哋轉攻熟食。值得一讚嘅係呢間嘢熟食嘅選擇真係幾多。先嚟一碟炸物，炸得啱啱好，至少賣相係金黃色嘅，而唔係黑炭頭。我朋友食個芝士年糕食得津津有味，我就幾欣賞個炸雞軟骨，炸得恰到好處。壽司料多飯少嘅配搭，一口一件，啱哂我哋想試多啲唔同嘅嘢。飲品選擇都真係算豐富，除了汽水、楊協成，仲有日本啤酒、梅酒、清酒。我哋就揀咗梅酒。呢間嘢食選擇真係幾多，作為食客真係名副其實嘅「番本」。