Outdark (H8)

Open Now

Now Closed

喺尖沙咀行完街搵地方醫肚，先生揀咗佢至愛嘅韓國餐廳，一向鍾意韓國菜嘅我當然冇異議。炸雞係每次必點，一如既往嘅大份，除咗炸雞之外仲有海量嘅薯格、薯角同薯條。甜辣炸雞依然係質素極高，絕對係我哋喺香港食過最好食嘅炸雞，即叫即炸，外皮香脆，已經去骨啖啖肉，咬落去鮮嫩多汁，甜辣醬惹味得嚟依然食到雞嘅鮮味，一流！炸薯又香又脆，灑上芝士粉超香口，輕鬆清碟！芝士豬肋骨份量亦多，濃郁嘅醬汁配上大量芝士，睇見都流晒口水。熱好咗個爐之後店員主動幫我哋撈芝士，睇見啲芝士慢慢融化仲拉到絲，撈埋醬汁同豬肋骨超吸引。豬肋骨好入味，加上濃郁嘅芝士非常合襯，而且唔會過鹹，食多幾件都唔會好膩。另一樣我好欣賞嘅就係拌碟嘅紫菜碎撈飯，非常香口，食完豬肋骨再食兩啖紫菜飯感覺清新。Blueberry smoothie用上新鮮藍莓打成，味道清新開胃，亦唔會過甜。因為疫情關係減少咗外出用餐，已經好一段時間冇嚟Outdark，餐廳無論係食物抑或服務都係一貫嘅出色，不枉我哋經常推薦俾朋友。