十和田總本店

Open Now

Now Closed

去尖沙咀性價比甚高的「十和田總本店」午膳，香港人收飲食咨詢的速度真係快，初開張時冇乜人，但今次下午兩點二去到，都要輪候近25分鐘才有座位。點菜用iPad，店員簡介操作方法後便自己動手order，幸好操作都算簡易。枱面上有綠茶粉自助沖用，質素又比想像中好喎。叫個$98的午市壽司定食（十貫）（聽聞呢個價錢做到八月底），講得做十貫，即係有十件，款式則隨當天貨源而略有變化，好像今天便沒有海膽了。一上枱，看見十件壽司中有我唔太like的蟹柳（應是取代玉子），真係打了個突。幸好，餘下九件質素都唔錯，尤其是那個加入蟹羔的蟹肉軍艦，十分鮮美。另外，甜蝦壽司大大件，最驚喜是那件用火鎗燒過，我懷疑是左口魚的白色魚壽司，入口帶油香，而且軟綿綿的感覺太美妙了。雖然呢個壽司set的海鮮非一級貨，但質素也非亂來，呢個價錢計埋加一都只係一百零幾蚊，真的算抵食。何況，這個套餐更包茶碗蒸及味噌湯。叫多個香蔥吞拿魚腩丼，更是喜出望外。吞拿魚腩蓉十分新鮮，師傅切功亦恰當，魚蓉中亦幼中有粗粒，夠口感，配埋香蔥、白芝麻，以紫菜為間隔，鋪在酸度及軟硬度剛好的壽司飯上，十分正斗！