Video
Read full review
2021-09-23
96 views
朋友最近轉咗工喺觀塘返工，放工後大家相約聚聚，傾吓近況。佢帶咗我去「為食火鍋公司」開餐，本身見為食公司呢個名已覺好熟口面，去到見到用咗狗狗🐶做餐廳Logo，我就知佢同深水埗間茶記係同一集團！觀塘店其實係近牛頭角地鐵站多啲，但從觀塘方向行過嚟都方便。觀塘店估計係新開張，因為我見佢貼住海報寫做緊$15優惠價嘅丼飯，同當時深水埗店一樣🤣。店舖環境相當唔錯，燈光明亮，座位整齊，而且牆身仲貼滿可愛狗仔嘅相片😍，盡顯店主對毛孩嘅熱愛。我好羡慕店主可以將自己鍾意嘅東西注入舖內，如果我有機會開店做老闆，我都一定會咁做。餐廳晚市主力做火鍋雞煲任食套餐 🍲，分兩個價位，每位收費$238或者$318，一分錢一分貨，貴啲個餐就梗係有多啲嘢食啦。現時餐廳仲做緊4位送1位嘅優惠，一家人嚟食就啱哂。即使呢度係半任食，但基本上佢套餐安排嘅食物全部上哂，我哋食完之後都已經飽咗九成🤰，好誇張呢。未食正餐前，先有兩款前菜，佢哋分別係枝豆同壽司薑，兩樣都係和風小食🎌。菜膽扣鮮鮑魚緊隨其後送上，鮑魚幾正，炆得軟稔入味，不比中式酒樓嘅出品遜色，伴旁仲有幾嚿西蘭花伴碟添🥦。五式刺身，為咗迎合香港人對刺身嘅喜愛🍣，套餐內容仲包括刺身
朋友最近轉咗工喺觀塘返工，放工後大家相約聚聚，傾吓近況。佢帶咗我去「為食火鍋公司」開餐，本身見為食公司呢個名已覺好熟口面，去到見到用咗狗狗🐶做餐廳Logo，我就知佢同深水埗間茶記係同一集團！
觀塘店其實係近牛頭角地鐵站多啲，但從觀塘方向行過嚟都方便。觀塘店估計係新開張，因為我見佢貼住海報寫做緊$15優惠價嘅丼飯，同當時深水埗店一樣🤣。
店舖環境相當唔錯，燈光明亮，座位整齊，而且牆身仲貼滿可愛狗仔嘅相片😍，盡顯店主對毛孩嘅熱愛。我好羡慕店主可以將自己鍾意嘅東西注入舖內，如果我有機會開店做老闆，我都一定會咁做。
餐廳晚市主力做火鍋雞煲任食套餐 🍲，分兩個價位，每位收費$238或者$318，一分錢一分貨，貴啲個餐就梗係有多啲嘢食啦。現時餐廳仲做緊4位送1位嘅優惠，一家人嚟食就啱哂。
即使呢度係半任食，但基本上佢套餐安排嘅食物全部上哂，我哋食完之後都已經飽咗九成🤰，好誇張呢。
未食正餐前，先有兩款前菜，佢哋分別係枝豆同壽司薑，兩樣都係和風小食🎌。
菜膽扣鮮鮑魚
2 views
0 likes
0 comments
五式刺身，為咗迎合香港人對刺身嘅喜愛🍣，套餐內容仲包括刺身併盤，當中包括五款魚生：三文魚、希靈魚、油甘魚、帆立貝以及虎蝦。全部都係厚切，色澤鮮麗，質素好過唔少日本餐廳。
為食寵寵雞煲
1 views
0 likes
0 comments
為食寵寵雞煲，雞煲都有得任食㗎，不過如果轉咗打邊爐就無得食返轉頭。🐔雞煲好大鍋，未撈匀前清晰見到佢落咗乜配料，有齊洋蔥、芹菜、芫荽、蒜頭、辣椒同花椒等一同爆香，非常惹味，但可惜我嗌咗BB辣🌶，辣味同麻味如果再濃一級就更好。雞件大大件，並冇斬到碎濕濕，肉質亦都唔嚡，如果計份量，應該足起碼半隻。
呢個雞煲比較特別，因為佢配埋三寶一齊食，即係有牛柏葉、豬皮同埋魷魚🦑。三樣都係掛汁一流嘅食材，撈勻後佢哋由白𠽌𠽌嘅顏色變到上哂色。留意返，佢個鍋火喉十足，但彈油嘅情況亦比較嚴重，要小心啲唔好整污糟衫啊⚠️。
聖子到海鮮拼盤
1 views
0 likes
0 comments
蟶子皇
1 views
0 likes
0 comments
手切牛肩頸
1 views
0 likes
0 comments
櫻桃鮮茄薯仔湯
3 views
0 likes
0 comments
西班牙黑豚肉以及五寶丸拼三色餃，牛肉冇得任食，但好彩豬肉有🐷。黑豚肉都幾好，起碼唔會太肥，如果直接用豬腩肉會吃不消。🥟雜丸雜餃拼盤打亂咗我哋嘅步伐，估唔到夾埋每人有成八粒，款式係好豐富，但有啲食滯咗，而且入貨款佔多，如果細食嘅人就留肚食其他嘢好過。
另外，餐廳亦提供咗幾款好啱索湯嘅食材，包括紫菜響鈴同鮮鴨血等😉。
蔬菜籃置放於門口對住嘅雪櫃，開頭有好多🥦，但食吓食吓剩返好少，而且好似冇作補充。因此我建議大家預早拎定一籃返埋位比較穩陣。
精選甜品係椰汁燉蛋白🥚，滲透出淡淡嘅椰香同蛋味，味道唔會太濃烈，並為豐盛嘅晚餐作結。
總括嚟講，為食公司無令人失望👍，而火鍋部份就更為出色，性價比高嘅任飲任食雞煲火鍋套餐，絕對能吸引食客再次幫襯！今餐真係食到我哋捧住個肚走，係開心嘅，推介🌟。
Post
