露面手工拌麵料理

在灣仔搵到一間新開的露麵，是一間手工車仔麵店，在疫情之下，勇氣可加，店舖是主打手工製麵，裝修簡單，但掛住一張張抽象派的畫都是與麵有關，值得欣賞下。野生松茸鮮雞湯（$38），天氣凍凍地最好叫盅燉湯先飲，湯是好清甜燉雞湯，感覺沒有落味精，松茸味好香，雞有大2片，雞肉嫰滑啖啖肉，冬天暖笠笠之選。鎮店蟹皇拌麵（$98），是一碗拌麵加一碗蟹皇醬，醬皇醬入面好多蟹膏同一絲絲好甜的蟹肉，真係落足心機拆蟹肉。未撈蟹皇醬前，可以先試試手工麵，好彈牙、煙煙韌韌，而且好有咬口，麵底相當出色。將麵混合蟹皇醬後，加入2-3匙醋，酸酸甜甜，將蟹膏蟹肉的味昇華了不少，非常開胃。鮮茄牛腩拌麵（$55），牛腩炆到好嫰口、半肥瘦，鬆軟得黎又無渣，蕃茄底很濃味，而且個汁帶點甜味，整體都很美味。芥香麻醬雞絲粉皮（$42），粉皮好爽口，帶點涼浸浸的感覺，芝麻醬的麻香味濃滑，而且是非常多醬，一絲絲都青瓜好脆口，每一口都很滿足。每碟只有300卡路里，作為低卡之選，果然驚喜。