Daap

Open Now

Now Closed

Daap係間兩三人經營嘅fusion小餐館，坐吧枱可以欣賞主廚+副廚互相配合準備嘢食，睇住主廚煮意粉、擺盤、開火槍等等，就好似睇表演咁精彩華麗，真真正正視覺+味覺享受。不過正因為得兩個人，所以要等得耐啲，而且樓面嘅侍應唔多醒目，會有啲甩漏。*Restaurant week (Appetizer + Main + Dessert) $198烤栗子湯配羊肚菌栗子味非常香，順滑濃厚嘅湯頭帶少許奶香，感覺每啖都係精華。羊肚菌脆脆嘅，索湯後半脆半腍，口感好讚！臘腸卡邦尼手工意粉用臘腸代替意式風乾豬肉，有鹹香又多一層臘腸嘅甜味。手工意粉有厚度、煙韌，撈勻半熟溫泉蛋，每一條粉都掛住滿滿嘅卡邦尼汁。醬汁已經有濃濃嘅蛋香、芝士香，上菜前用火燒到焦香，過程除咗表演之外，亦加多一層煙燻香。亞洲風味啤酒燉羊腿配茄子薯蓉羊腿肉非常入味，肉味唔會好膻，用刀切開容易+易離骨。肉質好嫩，但又保持到咬口。薯蓉綿滑，配搭茄子又好味，係意外嘅收穫！自家制酸種菠蘿包配奶茶雪糕菠蘿包帶發酵酸味，菠蘿皮夠脆，但整體偏乾硬。奶茶雪糕茶味好濃，完全冇冰粒感。