SuperNormal (Phase 2, Amoy Plaza)

Open Now

Now Closed

有一段時間冇過嚟淘大食嘢，今日同朋友嚟呢間酒吧餐廳，地方唔算好大，暗昧嘅燈光增添氣氛，另外有兩張室外餐枱。晚餐主要係散叫同埋有一個二人餐，為咗唔使煩就梗係食set算啦！套餐包1分日本池魚仔，有啲似細小版嘅秋刀魚，外表烤得香脆，有沙律醬可以點，每人都有三四條，味道唔錯。另外都仲有一個前菜，可以揀櫻花蝦蟹肉沙律或者法式牛肉批，我哋就揀咗牛肉批。其實就有啲似酥皮包住厚切火腿，感覺唔似食緊牛肉，但我都幾鍾意食，個底仲有沙律菜添。是日餐湯係蘑菇湯，不過味道偏淡，蒜蓉包每人一塊 ，香脆可口。主菜有A B兩個，A款選了「燒美國頂級肉眼牛扒配松露汁（12安士）」，雖然唔係好厚切，不過面積都算大，肉質柔軟。還有一舊炸芝士伴碟，幾好味！B款點了「俄羅斯汁烤雞焗飯」，似蕃茄洋蔥汁，雞肉都幾多，有菇、洋蔥絲、紅椒等配料，應該係即叫即焗，熱辣辣上碟，味道唔錯。二人餐亦包兩杯飲品，可以揀咖啡茶或汽水，亦可以加$12轉特飲。