【新店直擊】「那空猜是」麵：忠福麵館

好啦，我都知你唔會明白個題目講乜㗎啦。小編喺試食呢間忠福麵館之前，都真係未聽過「那空猜是」。不過拜訪過後，就一目了然啦。忠福麵館所賣嘅麵雖然係泰式，但絕對唔係你心目中諗嗰啲冬蔭功麵。泰國面積都幾大，食物特色都各有不同。忠福所賣嘅，係源自泰國那空猜是鎮（Nakhon Chai Si）嘅地道麵食，同為食貓之前係澳門小泰國（即係荷蘭園二馬路附近）食過嘅泰國麵，異曲同工。

呢度嘅麵有兩款湯底可以揀，分別係牛肉湯同豬肉湯。按道理你食牛就配牛湯、豬就豬湯；但如果你堅持混搭，其實老闆又真係唔介意。話時話，除咗麵食，忠福仲有飯賣。

豬牛雜美食

老闆話佢哋嘅豬軟骨最耍家，咁當然我又要試試啦。呢度嘅豬軟骨唔單止肉腍，連啲骨都好似啫喱咁，一咬就開。豬肉好入味，而且係一絲絲，好滑好香口。一碗豬軟骨米粉（$32），有成四件唔細嘅肉，幾抵食。米粉就比較幼身，同廣東米粉有啲唔同。

另外仲有好少地方有得食嘅炸豬皮，即係類似豬油渣嘅美食。係唔健康㗎啦，但真係好好食囉。硬得嚟脆口，滿滿嘅豬油香散滿成個口，人間美味。用湯浸返腍食就更加精彩，唔信你試吓吖！

微辣香料湯

唔同原料嘅湯底就係唔同肉味，口味上比較濃，而且有好多特色香料混雜嘅味道。飲落去有少少辣味，連食得辣嘅為食貓都覺得好醒神。另外，想再辣啲嘅話就可以加枱面嗰支酸辣汁，加多一層酸味，更加開胃更加泰國。

牛肉類除咗普通料牛肉片同牛腩之外，仲有牛𦟌、牛柏葉、牛脷，牛王頭們應該會幾高興。所有料可以配飯，或者湯／撈貴刁或米粉。單料$32、雙料$36，都幾抵食。

文：Hungry Cat
編輯：macau@openrice.com

隨時接收最新資訊
讚好OpenRice專頁！