權八居酒屋 (Moved) New Location

權八居酒屋係響銅鑼灣利園經營多年既日式餐廳，裝修雅致，以木材同埋深色裝修為主，有日式吧台，亦有榻榻米座位。榻榻米座位類似日本當地餐廳的個室，四人一枱，需要除鞋入座。枱與枱之間以木質通花固定屏風為間隔，私隱度高。呢類座位需要通常需要提前預訂，適合同客食飯或朋友小聚。午市定食套餐選擇多，每個餐都包括沙律、味噌湯、主菜、甜品、咖啡或茶。呢餐點左下面既和牛套餐，和牛只加左鹽做調味，外層煎得微脆，裡面5成熟，油脂分佈均勻。點上旁邊既芥末、蘿蔔蓉同味噌，可以減低和牛本身既油膩感，又保留肉既香味。但和牛份量較多，食到第4塊開始覺得有d滯，如果係同朋友來，建議點埋其他海鮮或刺身類既套餐share會更滋味。甜品係迷你蘋果批，暖暖的，唔太甜，作為餐後點綴啱啱好。