Siamama, Thai & Vietnamese (Closed)

星期五晚上出去食飯，又唔知食咩好。見餐廳有join買一送一優惠，就同媽咪爹哋老公一齊去食餐簡單晚飯。之前食過幾次，都知道服務麻麻，所以都期望唔高。但係今次真係最過分，食到我火都黎。其實我哋6:00一開門就已經坐低食。原因就係星期五晚我哋用買一送一都唔想阻住人做生意，諗住早啲去，食完就走。入到去坐低，我就問其中一位Staff（短頭髮boyish嘅女仔）優惠嘅詳情，問清楚邊啲係有優惠邊啲冇。佢嘅回答極敷衍，眼尾都唔望吓我，再問多兩句，直情行左去一邊開始做自己嘢。呢個時候其實已經嬲嬲哋，唔想做優惠就唔好join啦。又冇人逼你一定要做promotion，你做得promotion就預咗人哋會用，所以你啲staff都唔可以咁冇禮貌。啲嘢食OK嘅，稱唔上好正但唔難食。由頭到尾一個鐘7:00就埋單走。買單嘅時候啲Staff仲要大大聲同大家講「呢枱係買一送一嘅」驚死其他客唔知咁。呢餐飯真係食得唔開心，未來就算請我食都要諗下食唔食。