OPPA Coffee Bar Restaurant

係尖沙嘴行完街，朋友話想食韓國菜，所以我地去有韓國美食街之稱既金巴利街睇下食咩好。我地之後去到一間餐廳叫Oppa Coffee Bar Restaurant 出面見到人排哂隊，好奇心驅使下就去試下。店舖裝修簡約，食具環保得黎不失韓國風味。睇完個menu之後，就叫左雞肉蛋漿熔岩炒飯 (HKD 168)，三色韓國煎餅 (HKD 135)同埋韓式蒸餃子 (HKD 110)。先黎既就係佢地鎮店之寶:熔岩炒飯。佢地有泡菜，火腿蛋，秘製章魚，海鮮蛋，oppa 激辣和雞肉蛋漿選擇。而我地就選擇左雞肉蛋漿。個飯分量唔細，放左係個鐵板度，店員跟住會放芝士。放得滿滿之後，之後再加埋雞肉蛋漿就開始用火槍燒，將啲芝士溶化，最後就會變成芝士熔岩。佢個炒飯加埋啲芝士熔岩，口感真係一流，非常開胃，但無飽滯既感覺。跟住黎既就係三色煎餅，有泡菜，蔥同南瓜味。泡菜煎餅唔算太辣，可能我係泡菜控。蔥煎餅就咸咸地，味道唔錯。南瓜就甜甜地，有啲似甜品咁。最後就係韓式餃子(5隻)，佢有煎同蒸，我地要左蒸既。餃子好大仔，係菜肉涵，味道唔錯。仲有韓國蘿蔔伴碟。